Adroddiad newydd ar hawliau dynol
12.11.2025
“Mae cryfhau hawliau dynol yn fater sydd wrth galon ein democratiaeth a’n dyfodol” – Sioned Williams AS
- Lansiad adroddiad newydd ar hawliau dynol yng Nghymru
Mae’r Grŵp Trawsbleidiol ar Hawliau Dynol, dan gadeiryddiaeth Sioned Williams AS, wedi cyhoeddi adroddiad Cynnydd ar Hawliau Dynol yng Nghymru 2025 yn dilyn ymchwiliad i gyflwr hawliau dynol yng Nghymru.
Mae canfyddiadau’r adroddiad yn dangos, er gwaethaf degawd o argymhellion gan y Cenhedloedd Unedig, pwyllgorau’r Senedd, ymchwil annibynnol, a chymdeithas sifil, nad yw Llywodraeth Cymru wedi cyflawni ei hymrwymiadau yn y Rhaglen Lywodraethu i ymgorffori confensiynau allweddol y Cenhedloedd Unedig yng nghyfraith Cymru.
Mae’r adroddiad yn manylu ar y canlyniadau i bobl Cymru, ac yn galw am Ddeddf Hawliau Dynol i Gymru, y mae’n dweud y dylid ei chyflwyno cyn gynted â phosibl.
Cynhaliodd Sioned Williams ddadl yn y Senedd y hefyd ar bwysigrwydd cryfhau hawliau dynol i bobl Cymru.
Dywedodd Sioned Williams AS, Aelod Senedd Plaid Cymru dros Orllewin De Cymru:
Mae’r canfyddiadau, a gyhoeddwyd yn ein hadroddiad, yn datgelu Cymru lle mae hawliau dynol yn rhy aml yn addewidion yn hytrach nag yn amddiffyniadau penodol.
Yn y cyfamser, mae pobl Cymru yn parhau i wynebu tlodi, nawdd cymdeithasol annigonol, a rhwystrau i gael mynediad at ofal iechyd, tai, addysg a chyfiawnder, tra bod gwahaniaethu yn parhau i wadu hawliau pobl anabl, menywod, cymunedau hiliol, a phlant.
Cynhyrchwyd yr adroddiad gan yr Athro Simon Hoffman o Brifysgol Abertawe, a Glenn Page o Amnesty Cymru.
Dywedodd Glenn Page, Cyfarwyddwr Amnesty International Cymru:
Nid yw’n ddigon dweud ein bod yn cefnogi hawliau dynol; rhaid i ni ymgorffori hawliau dynol yn y gyfraith i sicrhau bod hawliau beunyddiol pobl yn cael eu hamddiffyn a’u cynnal nawr, ac yn y dyfodol.
Dyna pam mae Amnesty International Cymru yn galw am Fil Hawliau Dynol Cymru, oherwydd dyma’r unig ffordd i sicrhau amddiffyniadau i hawl pobl i addysg, iechyd, tai a’r holl bethau sydd eu hangen arnom i fyw gydag urddas a diogelwch.
Ychwanegodd Sioned Williams:
Hoffwn ddiolch i ysgrifennydd y grŵp Trawsbleidiol, yr Athro Simon Hoffman o Brifysgol Abertawe, a Glenn Page o Amnesty Cymru am eu gwaith ar gynhyrchu’r adroddiad hwn a’u hymroddiad hir i’r gwaith o gryfhau hawliau dynol yng Nghymru.
Cafodd y stori sylw gan y cyfryngau newyddion canlynol: (Seasneg yn unig)
[dolenni i wefanau allanol yn agor mewn ffenestr newydd]
Nid yw Comisiwn y Senedd yn gyfrifol am gynnwys a dolenni sydd wedi'u hymgorffori sy'n arwain at wefannau nad ydynt yn cael eu hariannu o adnoddau'r Comisiwn.