“Ffocws ar ddinasoedd" yn arwydd pryderus o bethau i ddod i drefi Cymru
Yn ddiweddar, ysgrifennodd Sioned Williams AS, Aelod o'r Senedd Plaid Cymru dros Orllewin De Cymru, at Marks and Spencer i fynegi pryderon am y bwriad i gau'r siop yng Nghastell-nedd, ac i ofyn am ffigurau gwerthiant ar gyfer y siop ac i ganfod a oes opsiynau eraill wedi cael eu hystyried a fyddai'n cynnal presenoldeb y brand yng nghanol tref Castell-nedd.
Mae Ms Williams, yr unig Aelod o'r Senedd sydd â swyddfa etholaeth yng Nghastell-nedd, wedi mynegi pryderon yn y gorffennol y byddai cau'r siop yn "lladd y dref".
Mewn ymateb i lythyr Ms Williams, cadarnhaodd Cyfarwyddwr Gweithrediadau Marks and Spencer y DU ac Iwerddon fod eu "perfformiad gwerthiant a'u gwerthiant cyffredinol" wedi gostwng 9.3% dros y degawd diwethaf, er, fel mae Ms Williams yn nodi:
“Nid yw'r llythyr yn cadarnhau faint o'r dirywiad hwnnw sydd wedi bod ers COVID, ac nid yw'n cadarnhau a yw'r siop yn parhau i fod yn broffidiol, er gwaethaf y gostyngiad mewn elw.”
Mae Cyfarwyddwr Gweithrediadau M&S yn mynd ymlaen i gadarnhau nad yw siop Castell-nedd yn addas i'w ad-drefnu i fod yn neuadd fwyd, ac nad yw'r cwmni'n bwriadu adleoli i safle llai, sydd wedi arwain Ms Williams i ddod i'r casgliad bod y penderfyniad eisoes wedi'i wneud.
Dywedodd Sioned Williams AS, Aelod o'r Senedd Plaid Cymru dros Orllewin De Cymru:
“Rwy'n credu bod canol ein trefi yn parhau i fod yn ganolfannau i’n cymunedau, a Chastell-nedd yn enwedig, gyda'i marchnad wych, ei gorsaf reilffordd ar y brif linell ac amrywiaeth o siopau a chaffis. Dyma un o'r rhesymau pam y dewisais i leoli fy swyddfa etholaeth yma.
“Mae manwerthu ar draws y bwrdd wedi cael ei effeithio gan COVID ac mae'r rhan fwyaf o siopau wedi teimlo ergyd y cynnydd mewn costau ar eu helw. Os yw Llywodraeth Cymru o ddifrif ynglŷn â gwneud 'ein dinasoedd, ein trefi a'n pentrefi yn lleoedd gwell fyth i fyw a gweithio ynddynt', mae angen iddyn nhw gymryd mwy o gamau i sicrhau bod busnesau'n gallu rhedeg yno.
“Os nad yw'r adeilad M&S presennol yn addas mwyach, os yw costau adnewyddu yn rhy uchel, ac nad ydynt yn bwriadu adleoli i un o'r unedau newydd neu wag yng nghanol y dref, nac ad-drefnu i fod yn neuadd fwyd, ni allaf weld pa opsiwn arall sy'n weddill ar gyfer y siop werthfawr hon. Rwy'n ofni bod y penderfyniad i gau'r siop eisoes wedi'i wneud.
“Bydd hon yn ergyd drom i'r dref a'i thrigolion. Er bod M&S yn honni y bydd cau siop Castell-nedd yn golygu y gall barhau i fuddsoddi mewn siopau eraill yng Nghymru, gan gynnwys ei siopau presennol yng Nghaerdydd ac Abertawe, a siopau newydd yn Llandudno a Wrecsam, nid yw hyn yn helpu pobl Castell-nedd, sydd wedi gwasanaethu'r cwmni a'i helpu i wneud elw dros gynifer o ddegawdau.”