Llwyddodd AS Plaid Cymru, Sioned Williams, i sicrhau ymrwymiad gan Lywodraeth Cymru i edrych ar wahardd glaswellt artiffisial mewn ardaloedd a ariennir yn gyhoeddus, yn dilyn galwadau gan yr AS.
Mewn cwestiwn i’r Gweinidog Newid Hinsawdd, Julie James, galwodd Sioned Williams AS ar Lywodraeth Cymru i wahardd y defnydd o laswellt artiffisial mewn mannau y mae gan Lywodraeth Cymru reolaeth drostynt, ac eithrio meysydd chwaraeon, ac i ystyried darparu cymhellion ariannol i annog a gwobrwyo rheolaeth gynaliadwy o erddi.
Mewn ymateb, dywedodd y Gweinidog dros Newid Hinsawdd y byddai’n sefydlu ymgyrch wybodaeth gyhoeddus i addysgu pobl o anfanteision glaswellt artiffisial, ac ymrwymodd i edrych mewn i wahardd glaswellt artiffisial mewn ardaloedd a ariennir yn gyhoeddus, ac archwilio allai Bil Cynhyrchion Plastig Untro newydd Llywodraeth Cymru gael ei ddefnyddio i gyflwyno gwaharddiad ehangach yng Nghymru.
Dywedodd Sioned Williams, AS Gorllewin De Cymru:
"Mae ymchwil a gyhoeddwyd yn ddiweddar gan yr Athro Ross Cameron o Brifysgol Sheffield yn amlygu pwysigrwydd amgylcheddol gerddi naturiol. Maent yn chwarae rhan hanfodol o ran oeri ardaloedd trefol, amsugno glaw, a thrwy hynny leihau'r perygl o fflachlifogydd, a chynnig lloches y mae mawr ei angen ar gyfer bywyd gwyllt. Mae'r adroddiad yn amlinellu rhai o dueddiadau dylunio a chynnal a chadw gerddi sy'n niweidiol i'r amgylchedd trefol, ac un o'r rhain yw'r defnydd o laswellt artiffisial.
"Mae glaswellt artiffisial wedi'i wneud o blastig a deunyddiau synthetig eraill, ac mae ganddo hyd oes o 8-15 mlynedd, ac ar ôl hynny gall nid yw'n rhwydd i'w daflu mewn modd cynaliadwy. Ar wahân i leihau buddion gerddi naturiol, mae gan y defnydd o laswellt artiffisial oblygiadau amgylcheddol eraill, megis rhwystro cynefinoedd mwydod a phryfed, tra gall trwytholchi microblastigau niweidio bywyd gwyllt.
"Ysgrifennais at Gyngor Abertawe yn fy rhanbarth am y mater hwn ar ôl cael fy hysbysu bod glaswellt artiffisial wedi cael ei ddefnyddio yn y gwaith adfywio dinasoedd. Mewn ymateb i'm llythyr, dywedon nhw na fyddai gwair artiffisial yn cael ei ddefnyddio gan y Cyngor mewn mannau cyhoeddus, hyd yn oed dros dro, wrth symud ymlaen. Anogais Lywodraeth Cymru i ddilyn esiampl dda Cyngor Abertawe, ac rwy'n falch nawr fod y Gweinidog, mewn ymateb i'm cwestiwn, wedi ymrwymo i ymchwilio i gyflwyno gwaharddiad ehangach yng Nghymru."
Gwyliwch isod: