AS yn galw am achub Theatr Fach Castell-nedd

“Os nad ydyn ni’n dod at ein gilydd i achub lleoliadau fel hyn, rydyn ni’n colli mwy nag adeilad yn unig” - Sioned Williams AS

Mae’r Aelod Senedd Plaid Cymru lleol, Sioned Williams AS, wedi cefnogi ymgyrch Theatr Fach Castell-nedd i godi arian ar gyfer gwaith cynnal a chadw hanfodol.

Bu Ms Williams yn ymweld â'r theatr yr wythnos hon ar ôl clywed am yr ymgyrch i achub yr adeilad.

Sefydlwyd Theatr Fach Castell-nedd ym 1935 a dylai fod yn y broses o gynllunio dathliadau ei phen-blwydd yn 90 ar gyfer y flwyddyn nesaf. Fodd bynnag, yn dilyn arolwg diweddar ar yr adeilad a argymhellodd gau dros dro, mae ymddiriedolwyr nawr yn edrych ar ffyrdd o ariannu gwaith cynnal a chadw  hanfodol yr amcangyfrifwyd y bydd yn costio dros £200,000.

Dywedodd Sioned Williams AS, Aelod Senedd Plaid Cymru dros Orllewin De Cymru:

“Nid lleoliad ar gyfer perfformiadau rheolaidd yn unig yw’r lleoliad hanesyddol ac unigryw hwn, mae’n hwb cymunedol llewyrchus a chefnogol sy’n dod â’r celfyddydau i bobl Castell-nedd. Pe na bai’r theatr hon yn gallu ariannu’r gwaith adfer, byddai hyn yn golled enfawr i’r gymuned leol, felly rwy’n gwbl gefnogol i’w hymdrechion i oresgyn yr argyfwng hwn a dod yn ôl yn gryfach.

“Mae gennym ni gymaint i fod yn falch ohono yng Nghastell-nedd, ac mae Theatr Fach Castell-nedd yn rhan o’n treftadaeth gyfoethog ac amrywiol. Nid yn unig oherwydd y cynyrchiadau arobryn, ond hefyd y cyfleoedd a roddir i’r gymuned leol i gymryd rhan mewn cymaint o wahanol weithgareddau. Os na fyddwn ni’n dod at ein gilydd i achub lleoliadau fel hyn, rydyn ni’n colli mwy nag adeilad yn unig.”

Dywedodd Janet Francis Jones, aelod o Theatr Fach Castell-nedd:

“Am y 90 mlynedd diwethaf ein nod fu meithrin ymdeimlad o gymuned, cariad at y celfyddydau a dod â chyfleoedd drama ac addysgiadol i bobl Castell-nedd a’r cyffiniau. Rydym yn hynod falch o’n theatr, ein noddwyr, ein cefnogwyr ffyddlon a’n tîm ymroddedig o wirfoddolwyr, ond mae angen help arnom i sicrhau y gallwn ail-agor ein drysau a pharhau i ddarparu theatr o safon i’r gymuned am y 90 mlynedd nesaf.”