Mae AS Plaid Cymru Sioned Williams wedi galw ar Lywodraeth Cymru a Chyngor Castell-nedd Port Talbot i roi mwy o ffocws ar Ganol Tref Castell-nedd er mwyn mynd i’r afael â siopau gwag, ymddygiad gwrthgymdeithasol a lleihad yn nifer y bobl sy’n ymweld â chanol y dref
Cododd Sioned Williams y mater gyda’r Prif Weinidog Mark Drakeford yn y Senedd heddiw (dydd Mawrth, Mehefin 22ain 2021).
Mae Sioned Williams wedi siarad â nifer o berchnogion siopau a masnachwyr marchnad yn y dref sy'n poeni am y gostyngiad mewn nifer y rhai sy’n dod i siopa ac ymddygiad gwrthgymdeithasol yng nghanol y dref. Ar hyn o bryd mae 18 o unedau manwerthu gwag ym mhrif strydoedd Canolfan Tref Castell-nedd.
Dywedodd Sioned Williams:
“Ar ôl siarad â’r rhai sy’n berchen ar siopau a masnachwyr marchnad yn ddiweddar mae’n amlwg bod canol tref Castell-nedd yn cael hi’n anodd iawn ar hyn o bryd o ran mynd i’r afael ag ymddygiad gwrthgymdeithasol ac yn sgil y ffaith bod llai o bobl yn dod i ganol y dref.
“Gobeithiaf y bydd datblygiad y pwll nofio, caffi a llyfrgell yn y dref yn helpu i ddod â nifer uwch o bobl ii’r dref, ond mae yna deimlad na fydd hynny, ar ei ben ei hun, yn ateb.
“Dim ond yr wythnos diwethaf fe soniwyd wrtha i bod tua 18 o unedau manwerthu gwag ar hyn o bryd ym mhrif strydoedd canol y dref. Mae angen gwneud mwy i sicrhau bod busnesau newydd yn cael eu sefydlu yng nghanol y dref, a'n bod yn gweld gostyngiad yn nifer yr unedau manwerthu gwag sydd gennym ar hyn o bryd.
“Mae’n destun pryder ei bod yn ymddangos bod BID Canol Tref Castell-nedd yn dod i ben, gan nad oes digon o gefnogaeth ymhlith busnesau i’w weld yn parhau.”
Teimlai'r AS Plaid Cymru fod mynd i'r afael â'r ymddygiad gwrthgymdeithasol yn y dref a gwella'r cynnig yng nghanol y dref yn hanfodol, gan ychwanegu:
“Mae angen mynd i’r afael yn uniongyrchol â’r ymddygiad gwrthgymdeithasol a’r adroddiadau o gymryd cyffuriau yr ydym yn clywed sôn amdanynt, ac mae angen i Lywodraeth Cymru fod yn gweithio gyda Chyngor Castell-nedd Port Talbot a Heddlu De Cymru ar y mater hwnnw.
“Ni fydd y cynlluniau i ddatblygu Piaza yng Nghastell-nedd yn cyrraedd yn bell iawn os nad eir i’r afael â’r materion hyn.
“Wrth i gyfyngiadau Covid gael eu llacio, mae angen i ni weld digwyddiadau diwylliannol, cerddorol, celfyddydol a chymunedol yn cael eu cynllunio ar gyfer canol y dref i ddenu ymwelwyr.
“Mae angen i Lywodraeth Cymru wneud gwaith ychwanegol gyda Chyngor Castell-nedd Port Talbot i geisio datblygu a chefnogi ystod ehangach o weithgarwch ac atyniadau yng nghanol y dref, gan gynnwys cefnogi masnachwyr annibynnol lleol. Bydd sicrhau cyfraddau busnes a rhenti is yn allweddol i hynny.
“Ni allwn barhau i weld unedau gwag yng nghanol y dref, ac mae Llywodraeth Cymru a Chyngor Castell-nedd Port Talbot yn rhan annatod o ddatrys y sefyllfa honno.”