Mae AS Plaid Cymru Sioned Williams yn gweithio gydag aelodau o'r cyhoedd yn Abertawe i geisio achub teulu o Afghanistan sy'n wynebu bygythiad uniongyrchol i'w bywydau.
Ar hyn o bryd mae'r teulu'n byw yn Kabul ac maent wedi cefnogi a hyrwyddo hawliau menywod a democratiaeth yn Afghanistan dros y blynyddoedd diwethaf.
Mae gweithgareddau’r teulu’n cynnwys rhedeg grŵp cymorth gwirfoddol lleol i ferched, darparu dosbarthiadau Saesneg, gofal plant gwirfoddol, hyrwyddo hawliau menywod, cefnogi siopa ar y cyd i ymestyn cyllid teuluoedd, a helpu menywod sy’n dioddef o golled a thrawma.
Mae perthnasau y teulu o Afghanistan yn y DU wedi estyn allan at Sonia Klein o Abertawe, sydd wedi cael cymorth Sioned Williams MS.
Mae Sioned Williams bellach wedi ysgrifennu at y Prif Weinidog Mark Drakeford AS ar y mater.
Dywedodd AS y Blaid:
“Mae pobl sydd â theulu a ffrindiau yn Kabul wedi cysylltu â thrigolion lleol yn Abertawe sy’n wynebu bygythiad real iawn gan y Taliban.
“Ers i’r Taliban orchfygu Llywodraeth Afghanistan, mae’r teulu’n credu y byddan nhw’n cael eu targedu o ganlyniad i’w gweithgareddau. Maen nhw’n ofni y byddan nhw'n cael eu cipio, eu treisio, eu curo a'u gadael yn farw, a'u gwneud yn esiampl i ferched eraill. Cred y teulu eu bod yn gymwys i gael eu cludo i’r DU, ond er gwaethaf hyn, maent yn Afghanistan o hyd ac yn teimlo eu bod wedi'u gadael ar ôl gan awdurdodau'r DU.
“Rwy’n pryderu am yr adroddiadau newyddion dros y penwythnos bod miloedd o negeseuon e-bost gan ASau sy’n codi achosion fel un y teulu hwn heb eu darllen gan y Swyddfa Dramor, Gymanwlad a Datblygu (FCDO).
“Oherwydd y bygythiad difrifol i’r teulu hwn, a chan fod y Senedd wedi datgan bod Cymru’n Genedl Noddfa, rwyf wedi ysgrifennu at y Prif Weinidog yn ei annog i ymyrryd i sicrhau bod dioddefaint y teulu hwn yn cael ei godi gyda Llywodraeth y DU a’u bod yn cymryd pa gamau bynnag y gallan nhw i gynorthwyo'r teulu i adael Afghanistan. ”
Mae Sonia Klein, o Abertawe, wedi bod yn cefnogi amryw o grwpiau menywod Mwslimaidd ers dros 30 mlynedd. Dywedodd:
“Mae nifer o bobl wedi estyn allan ataf am help ac rwyf wedi ceisio cael y teulu hwn ar y radar i’w cludo allan o’r wlad drwy fy rhwydweithiau personol yn y DU, y Cenhedloedd Unedig ac UDA. Mae'n sefyllfa mor anobeithiol. Rwy'n credu bod yn rhaid i ni ddal ati i wthio pawb i wneud popeth y gallwn. Mae mor bwysig bod gan Gymru lais yn hyn, ac yn enwedig Abertawe gan ein bod yn Ddinas Noddfa. Rwy’n sylweddoli na allwn ddatrys popeth a bod gennym ddim rheolaeth dros bolisi tramor, ond mae Cymru yn wlad dosturiol a chymunedol a gobeithio y gallwn achub y teulu hwn. ”
Ychwanegodd Sioned Williams:
“Mae’n dda bod awdurdodau lleol ledled Cymru bellach wedi ymrwymo i ddod o hyd i lety i bobl sy’n ffoi o’r golygfeydd ofnadwy rydyn ni’n eu gweld yn Afghanistan, ond mae gan Lywodraeth Cymru rôl hefyd wrth ddwyn i sylw Llywodraeth y DU yr achosion hynny lle mae unigolion a theuluoedd wedi bod yn cefnogi'r ymdrech ryngwladol, ond bellach yn cael eu hunain yn gaeth ac heb gymorth. Rhaid i ni wneud popeth o fewn ein gallu i helpu'r bobl hyn.
