Mae Sioned Williams, Aelod o'r Senedd Plaid Cymru dros Orllewin De Cymru, wedi galw ar Drafnidiaeth Cymru i geisio barn y gymuned ar ddyfodol gorsaf reilffordd Castell-nedd, yn dilyn pryderon nad yw cyflwr presennol yr orsaf yn foddhaol.
Mae swyddfa’r AS wedi’i lleoli rhwng Orsafoedd Rheilffordd a Bws Castell-nedd.
Dywedodd Sioned Williams:
“Er taw Gorsaf Reilffordd Castell-nedd hi yw’r chweched orsaf fwyaf yng Nghymru o ran y nifer o ddefnyddwyr – sef hanner miliwn o bobl – nid yw’n cynnig croeso cynnes ar hyn o bryd. Mae'r orsaf ei hun yn edrych yn adfail a gall yr adeilad swyddfa bost gwag gerllaw roi argraff annheg i bobl sy'n cyrraedd y dref.
“Mae sawl busnes yn yr ardal gyfagos wedi buddsoddi mewn ceisio creu gofod deniadol a bywiog, ond dim ond hyn a hyn y gallant ei wneud.
“Nid yn unig mae gorsafoedd rheilffordd yn fodd hanfodol o gymudo dyddiol i weithwyr ledled ein gwlad, maent hefyd yn gweithredu fel canolfannau trafnidiaeth gyhoeddus lleol, pwyntiau gwybodaeth cymunedol ac hefyd yn helpu creu ymdeimlad o le.”
Yn 2018, ceisiwyd cyllid gan Raglen Targedu Buddsoddiad mewn Adfywio Llywodraeth Cymru er mwyn cefnogi datblygiad canolbwynt trafnidiaeth integredig ar gyfer Castell-nedd.
Ar y pryd, fe ddywedodd swyddogion y cyngor taw eu gobaith oedd y byddent yn gallu cyflawni rhywbeth tebyg i Hwb Trafnidiaeth Port Talbot – gan ddod â gwasanaethau trên, bysiau a thacsis ynghyd â chynlluniau teithio llesol mewn un lle.
Ychwanegodd Sioned Williams:
“Rwyf eisoes wedi ysgrifennu blaen at Drafnidiaeth Cymru a Chyngor Castell-nedd Port Talbot, ac er gwaethaf rhai enghreifftiau o fuddsoddiad, nid yw’n ymddangos bod unrhyw strategaeth gynhwysfawr, gyhoeddus ar gyfer gwella’r orsaf hon a’r ardal gyfagos ac mae’r cynnydd yn llawer rhy araf.
“Rwyf nawr yn galw ar Drafnidiaeth Cymru i weithio gyda rhanddeiliaid lleol, gan gynnwys y cyngor bwrdeistref sirol, y cyngor tref, busnesau, grwpiau cymunedol a defnyddwyr trafnidiaeth gyhoeddus, i lunio cynllun ar gyfer adfywio’r orsaf hon.”