Diolch i Blaid Cymru fe fydd prydau ysgol am ddim i blant ysgol cynradd yng Nghymru yn dechrau mis Medi.
Dywedodd llefarydd Plaid Cymru dros Gydraddoldebau a Chyfiawnder Cymdeithasol, Sioned Williams:
"Mae hwn yn gam enfawr ymlaen yn ein hymdrechion i fynd i’r afael â thlodi yng Nghymru, ac yn un a fydd yn gwneud gwahaniaeth gwirioneddol i gynifer o blant.
"Roedd prydau ysgol am ddim drwyddi draw ar gyfer plant ysgolion cynradd yn brif addewid etholiadol i Blaid Cymru yn etholiadau’r Senedd yn 2021, ac yn un oedd yn flaenoriaeth gennym wrth helpu i ddatblygu’r Cytundeb Cydweithio."Tra fy mod i’n deall y bydd y rhan fwyaf o ysgolion yn dechrau eu cyflwyno fis Medi yma, o ystyried effaith yr argyfwng costau byw ar deuluoedd, rhaid i ni sicrhau bod awdurdodau lleol nad ydyn nhw ar y trywydd iawn eto yn cael eu cefnogi i ymdrechu’n wirioneddol rhwng nawr a dechrau’r ysgol ym mis Medi, ac yn y misoedd sy’n dilyn wrth i’r polisi gael ei gyflwyno ar gyfer plant hŷn, fel bod prydau am ddim yn cael eu cyflwyno cyn gynted â phosib i gynifer o’n plant â phosib."Gallai’r polisi hwn olygu’r gwahaniaeth rhwng plentyn yn llwgu neu beidio – dyna pa mor bwysig yw e.
"Mae ein diolch twymgalon yn mynd i’r rheiny sy’n gweithio yn yr awdurdodau lleol ledled Cymru – staff arlwyo, y rheiny sy’n dylifro ac yn cydlynu’r cyflwyno – wrth gydnabod pa mor bwysig yw hi ein bod ni’n cael hyn yn iawn er lles ein plant."
Ydych chi'n hoffi'r neges hon?