Galw cyfarfod cyhoeddus dros gau banc

Sioned Williams AS yn galw cyfarfod i glywed barn trigolion ar gynlluniau i gau'r banc olaf yng Nghwm Tawe

Mae Sioned Williams AS, sy'n byw ym Mhontardawe, ac yn Aelod o'r Senedd dros y rhanbarth, wedi mynegi ei "dicter" dros benderfyniad Grŵp Bancio Lloyds i gau eu cangen yn y dref.

Bydd cau'r banc ym mis Tachwedd 2025, yn gadael Pontardawe - a Chwm Tawe cyfan - heb fanc.

Mae Ms Williams wedi galw cyfarfod cyhoeddus am 6pm ddydd Iau 6 Chwefror yn Llyfrgell Pontardawe i glywed barn trigolion.

Yn y cyfamser, mae hi wedi agor deiseb fel bod pobl leol sy'n methu mynychu'r cyfarfod yn hefyd yn medru cyfrannu eu barn.

LLOFNODI'R DDEISEB

Mae Sioned Williams hefyd wedi ysgrifennu at Lywodraeth Lafur y DG i ofyn am "weithredu ar atal y llanw o fanciau sy'n gadael ein strydoedd mawr yng Nghymru."

Dywedodd Sioned Williams AS, Aelod o'r Senedd Plaid Cymru dros Orllewin De Cymru:

“Rwy'n hynod o grac y bydd tref Pontardawe yn cael ei gadael heb fanc yn dilyn penderfyniad Lloyds i gau eu cangen ym mis Tachwedd. Hwn fy manc lleol ac rwy'n gwybod bod defnydd mawr ohono! Bydd cau'r banc yn gadael bwlch enfawr o ran gwasanaethau bancio yng Nghwm Tawe.

“Dwi'n gwybod bod angen banc go iawn ar fusnesau ac ar drigolion lleol - dyw nifer ohonyn nhw ddim yn bancio ar-lein. Mae sicrhau ein bod yn cadw'r gallu i brynu a gwerthu gydag arian parod yn ein cymunedau yn fater o degwch a chynhwysiant.

“Er enghraifft fel cadeirydd y Grŵp Trawsbleidiol yn y Senedd ar Anableddau Dysgu, rwyf wedi bod yn cefnogi ymgyrch Mencap i sicrhau y gall pobl ddefnyddio arian parod i dalu am nwyddau a gwasanaethau. Rwyf wedi clywed gan lawer o bobl ledled Cymru nad ydynt yn gallu defnyddio bancio ar-lein, na defnyddio cardiau debyd neu gredyd, ond mae ganddynt y gallu i ddefnyddio arian parod, ac mae hyn yn rhan bwysig o'u hannibyniaeth.

“Er mwyn i fusnesau bach allu derbyn arian parod, maen nhw angen gwasanaethau sydd gerllaw er mwyn ei fancio. Mae banciau felly yn golygu mwy i gymuned na dim ond lle sy'n trin a tharfod eu harian - maen nhw'n galluogi llif arian drwy gymuned.

“Mae grwpiau bancio mawr yn aml yn hysbysebu eu hunain fel calon eu cymuned, ac yn hapus i elwa o'r sefyllfa honno, ond mae'n ymddangos nad ydyn nhw'n cymryd unrhyw gyfrifoldeb am y canlyniadau pan maen nhw'n penderfynu gadael. Rwy'n credu ei fod yn sgandal nad oes rheidrwydd ar fanciau sy'n gwneud elw enfawr i ddarparu gwasanaethau i'r cymunedau sydd wedi bod yn gwsmeriaid ffyddlon iddynt ers degawdau.”