“Mae’n sgandal nad oes rhaid i fanciau sy'n gwneud elw enfawr ddarparu gwasanaethau i'r cymunedau sydd wedi bod yn gwsmeriaid ffyddlon iddynt ers degawdau” - Sioned Williams AS
Mae NatWest wedi cyhoeddi y bydd eu cangen yng Nghastell-nedd yn cau ar 13 Hydref 2025.
Mae Sioned Williams AS, Aelod Plaid Cymru o'r Senedd dros Orllewin De Cymru, sydd â’i swyddfa 500 troedfedd o gangen NatWest yng nghanol tref Castell-nedd, wedi mynegi ei "siom ddofn" yn am y penderfyniad.
Dywedodd Sioned Williams AS, Aelod Plaid Cymru o'r Senedd dros Orllewin De Cymru:
“Rwyf wedi ysgrifennu at NatWest heddiw i fynegi fy mhryder am effaith eu penderfyniad i gau cangen Castell-nedd, a gofyn iddyn nhw ailystyried eu penderfyniad.
“Mae'n dilyn y patrwm o fanciau y stryd fawr yn cau eu hadeiladau, gan atal mynediad unigolion a busnesau i wasanaethau bancio wyneb yn wyneb.
“Mae Banciau'r Stryd Fawr yn gyflym i hysbysebu eu hunain fel rhai sydd wrth galon y gymuned, ac yn hapus i wneud elw o hynny, ond maen nhw'n anghofio'r cyfrifoldeb a ddylai fod yn rhan o hynny yn ddigon cyflym mae’n ymddangos. Rwy'n credu ei bod yn sgandal nad oes rhaid i fanciau sy'n gwneud elw enfawr ddarparu gwasanaeth i'r cymunedau sydd wedi bod yn gwsmeriaid ffyddlon iddynt ers degawdau.
“Mae'r bwlch a adawyd ar ôl gan y banciau stryd fawr hyn yn fwy na dim ond adeiladau gwag ar y stryd fawr. Mae sicrhau ein bod yn cadw'r gallu i drafod gydag arian parod yn ein cymunedau yn fater o degwch a chynhwysiant, a bydd yn ergyd i fusnesau lleol yng Nghastell-nedd sy'n defnyddio NatWest ac sy'n ymdrechu mor galed i gadw canol y dref yn fywiog ac yn le sy’n ffynnu, ac i'r cwsmeriaid sydd eisiau ac angen gwasanaethau bancio personol lleol wyneb yn wyneb.”