Gofynnodd llefarydd Plaid Cymru dros Gyfiawnder Cymdeithasol a Chydraddoldebau, Sioned Williams AS, i Lywodraeth Cymru ymateb i ddeiseb gan elusen anableddau dysgu yn galw ar leoliadau a ariennir yn gyhoeddus sicrhau eu bod yn cynnig yr opsiwn i dalu ag arian parod.
Mewn cwestiwn ddoe i’r Gweinidog dros Gyfiawnder Cymdeithasol, Jane Hutt, dywedodd Sioned Williams, sy’n cynrychioli Gorllewin De Cymru yn y Senedd:
“Rwy’n falch iawn o fod yn Gadeirydd ar Grŵp Trawsbleidiol y Senedd ar Anableddau Dysgu, ac yn anffodus mae’r anghydraddoldeb a wynebir gan bobl ag anableddau dysgu mewn bywyd bob dydd yn bwnc trafod rheolaidd yn ein cyfarfodydd.
“Dros y misoedd diwethaf, mae [yr elusen anableddau dysgu] Mencap Cymru wedi clywed gan lawer o bobl sy’n pryderu bod mwy a mwy o fusnesau a sefydliadau yn symud at daliadau di-arian yn unig ar gyfer eu nwyddau a’u gwasanaethau. Nid oes gan nifer o bobl ag anabledd dysgu fynediad i'w cyfrifon banc eu hunain, ac i nifer eraill, efallai taw dim ond gyda cherdyn y bydd eu cardiau'n caniatáu iddynt godi arian parod. Oherwydd hyn, ni all lawer o bobl ag anableddau dysgu dalu am bethau bob dydd na chael mynediad cyfartal i lawer o siopau, bwytai a chyfleusterau hamdden.
“Ond er efallai nad oes gan unigolyn ag anabledd dysgu y gallu i reoli cyfrif banc, neu ddefnyddio cardiau debyd neu gredyd, yn sicr mae ganddyn nhw’r gallu i ddefnyddio arian parod, ac mae hyn yn rhan bwysig o’u hannibyniaeth; mae’n eu helpu gyda chyllidebu, gan sicrhau nad ydynt yn mynd i ddyled. Felly, Weinidog, beth y mae Llywodraeth Cymru yn ei wneud i alluogi pobl ag anableddau dysgu dalu am bethau ag arian parod lle bynnag a phryd bynnag y mae angen iddynt wneud hynny, er mwyn iddynt allu cadw eu hannibyniaeth a'u hyder, a chymryd rhan lawn mewn cymdeithas? A wnewch ymateb i’r galwadau a wnaed gan ddeiseb Mencap Cymru ar leoliadau a ariennir yn gyhoeddus neu’r rhai sy’n derbyn grantiau i sicrhau eu bod yn cynnig yr opsiwn hwn?"
Wrth ymateb, dywedodd y Gweinidog dros Gyfiawnder Cymdeithasol, Jane Hutt AS ei bod wedi ysgrifennu’n ddiweddar at Gadeirydd y Pwyllgor Deisebau, Jack Sargeant AS, yn ymateb i’r ddeiseb honno.
Daeth y ddeiseb, sydd wedi derbyn 1,926 o lofnodion, i ben ddydd Llun ac mae bellach yn cael ei hystyried gan Bwyllgor Deisebau'r Senedd.
Gwyliwch gwestiwn Sioned Williams isod: